internet

Udaltop bloga martxan

Lotura

Udaltop jardunaldien inguruko blogean berrikuntzan egin dira. Hona hemen handik bidali diguten mezua:

Udaltop jardunaldien bloga martxan da

Facebook eta Twitter sare sozialetan erabiltzailea zabaldu du Udaltopek, ezagutza partekatzeko eta mezuak zabaltzeko bide berriak landuz.
Iaz, Udaltop udaletako euskara-zerbitzuen topaketen lehen edizioan, “Nola indartu euskararen erabilera familietan?” gaia jorratu zen. 2010eko apirilean izango diren bigarren jardunaldietarako hainbat berrikuntza prestatu dira, hala nola, bloga eta sare sozialak.
Udaltop.com webgunean dagoeneko martxan den blogaren helburua parte-hartzaile eta antolatzaileen arteko harremana sustatzea, 2010eko edizioaren gaiaren eta egitarauaren definizioan parte hartzea eta zeuen iruzkinak helaraztea da.
Esan bezala, bloga ez da aurtengo edizioko berrikuntza bakarra. Facebook eta Twitter sare sozialetan Udaltop erabiltzaileak sortu dira eta horiei esker, Udaltop sareko partaide izan daiteke edonor. Hau da, udaletako euskara-zerbitzuen topaketetan interesa duten beste kideekin mezuak partekatzeko eta antolatzaileek igorritako informazioa jarraitzeko aukera izango da.
Gainera, blog berriak RSS jarioa du. Beraz, edozein RSS agregatzailetan iturri hori gehituz gero informazio gaurkotua jasoko da.

Egun bat mendian "in plain basque"

Ortuella BHIko ikasle-irakasleek klasera ekarri dute Commoncraft estiloa.

Via: Tres Tizas.

Ikasgelan blogak egiteko tridekalogoa euskaraz

Lotura

Berta Martinezen blogean ikasgelan blogekin hasteko hamahiru aholkuko tridekalogoa aurkitu dugu. Gaztelaniaz sortutako dokumentua euskaratu dute Bertak, Irene Gonzalezek eta Jasone Aldekoak.

Sarean irakurtzen trebatzeko aktibitateak

Lotura

Felipe Zayasek sareko testuekin ohitu eta haiek irakurtzen trebatzeko aktibiate zerrenda bat egin du. Geurera ekartzeko ideia politak izan daitezkeela begitandu zait.

Zelan daki ba?

Aizu! aldizkariaren webgunea berriztuta

Lotura

Tarte batean desagertuta egon ostean berriro agertu da Aizu! aldizkariaren webgunea. Paperezko aldizkariaren edukiak orain sarean diseinu berriareki irakurtzeko parada izango dugu.

Euskara sarean

GipuzkoaTV kateak euskara ikasten Internetek zelan lagundu dezakeen azaltzen duen saiotxo hau jarri du sarean. Tresna batzuk aurkezten dizkigu hain zuzen ere.

Euskaraz eta gaztelaniaz daukagu. Klasean Interneten zer daukagun azaldu edo aurkeztu nahi badugu oso lagungarria izan daiteke.

Hitzokeiren biltegia

Lotura

Aspaldian aipatu genuen hemen #hitzokei ekimena, Twitter-en hiztegi eroa sortzen joateko proposamena. Arrakasta izan du Twitter-en, baina han sarrerak topatzea eta biltzea ez da erraza izaten.

Duela aste batzuk Mikel Iturbek wiki batean biltzen eta ordenatzen hasi zen. Wikira lantzean behin bildu eta "eskuz" ekarri behar da hala ere, eta lan hori automatikoki egiteko modua aurkitzea komeni zen. Julen Ruiz Aizpuruk egin du eta hortxe daukagu orain hitzokei-ren biltegi automatikoa.

Euskara ikasleei gustatuko zaiela esango nuke, askok inoiz halako jolasak egin dituztela ere bai. Jolasa hizkuntza ikasteko bide ona izaten da, ezta?

Via: Sustatu.

PD: Sustatu, A-Sustatu... hitzokeirako definizioren bat okurrituko zait/zaigu.

Gaurko hitzak urtebete

Maite Goñik kudeatzen duen hiztegi-blogak 395 sarrera ditu dagoeneko "opor" hitza aipatu gabe. Eta hemendik aurrera bideoa ere aurkituko dugu han.

Han gaurko hitza "ahutzeko" izan da, baina sarean gehien ibiliko dena "zorionak" seguruenik. Aupa tu!

Gaurko Hitzak urte bat bete du gaur! (IKTeroak)

Azkue fundazioa

Lotura

Gaur Iñaki Muruaren bidez heldu zaigu Azkue Fundazioaren berri. Proiektua datorren azaroaren 4an aurkeztuko da. Asmoa euskara sarera eta teknologiaren modernitatera ekartzea dela dirudi. Egitasmo asko  bateko (Xuxen bizkaieraz adibidez), eta  Twitter, Flickr, Youtube... besteko. Web2.0 ikuspegia eman nahi izan zaiola dirudi. Hemen duzue Youtuben aurkitu dugun bideo hau adibidez:

Bitxikeria pare bat, JClic software-a JKlik bihurtu digute, eta blogrollean zer eta Karrajua aurkitu dugu.

Datorren azaroaren 4an informazio gehiago izango dugu beraz.

Irakurle Kluba

Lotura

Gorka Azkaratek eman digu sare honen berri. Leioako irakurle-klubaren inguruan sortu da (ez nahastu Leioako Unibertsitateko irakurle klubarekin) eta, jakina, literatura du ardatz.

Hizkuntzak ikasteko 100+ leku

Lotura

Jane Harten blogean aurkitu dugu zerrenda honen lotura. Interneten hizkuntzak ikasteko guneen zerrenda azken batean.

Hori bai, "basque", "euskara" edo "euskara" hitzak ez ditut aurkitu zerrendan. Bai beste honetan berriz.

Prestakuntza (eta ikaskuntza) sarean

Ikasleak mintzo: autoikaskuntza internet bidez

Lotura

Santurtziko Udal Euskaltegian ikasleei galdetu diete zer euskara Internet-en bidez ikasteaz zer uste duten, bideo-kamara aurrean jarri eta hor dugu.

Bideoa enbotatu dut hemen goian. Ez dakit zelan ikusiko duzuen. Bestela lotura daukazue gorago.

Berrikuntzak Sustatun: Letrak sare kantoitik eta Masai ikastaroa

Lotura

Hau irakurtzen duzuenoi Sustatu aurkeztu beharrik ere ez da egongo (ez, ezta?), euskarazko blog betenaroetakoa (ez beteranoena) eta bisitatuenetakoa (bisitatuena bai?). Eta beteranoa eta bisitatua bada, zerbaitengatik izan da, seguruenik kietoparao geratu beharrean lantzean behin sorpresaren bat ematen dutelako. Eta hala egin dute asteon, atal eta kolaboratzaile koadrila berria du Sustatuk orain.

Kolaboratzaileen artean ezezagun gutxi, izan ere, euskal blogosferako klasikoen selekzioa egin dutela pentsa daiteke, eta atal berrien artean hizkuntzaren eta irakaskuntzaren inguruan endredatzen gabiltzanontzako bi bereziki interesgarriak:

• Letrak sare kantoitik: Anjel Lertxundiren ideia batetik abiatuta, hizkuntzaren inguruko bitxikeriak, joalasak eta aipagaiak batzea dute helburua, eta Anjel berarekin batera beste bi kolaboratzaile ditugu hor: Maite Goñi eta Markos Gimeno,  besteak beste Gaurko Hitzaren arima bata, eta palindromoak eta #hitzokei jolasen berba jolasen sustatzailea bestea. Ez zait oso argi geratu Sustaturen atal honetan kolaboratzaileek beste lekuetan publikatzen dituztenak (ber)publikatzera mugatuko diren ala ekarpen berriak ere izango ditugun, edozelan ere jendearen ekarpenak egiteko ateak zabaldu dituzte Sustatukoek.
• Masai ikastaroa. Hau ere ez da ideia berri-berria, euskararen agerpen publikoetan ikusitako disparate ortografiko, gramatikal, semantiko, sintaktiko, morfologiko, diskurtsibo eta ortotipografikoak batzea da asmoa, Euzkal Errian Euzkaras eta Mihiluzeren Zazpikiak ekimenen antzera hain zuzen ere. Hemen ez dago kolaboratzaile berezirik, jendearen ekarpenak egiteko aukera irekita bai, ordea.

Polita orain Sustatun hizkuntzaren inguruko hauek irakurtzeko eta jasotzeko aukera duda barik. Dena dela, ea dream team horrekin liga erregularrari ez diogun interesa kentzen.