HABEren plan estrategikoaren lorratzen atzetik

HABEren plan estrategikoa egin zenean argi eta garbi ikusi zen euskaltegiei eskumen gehiago emateko beharra.

— Lurdes Auzmendi

Lehengo albistea erdaraz jaso genuen hedabide batean, eta orain Lurdes Auzmendik bere blogean azaldu dizkigu euskaraz aurtengo azterketen nondik norakoak.

Azalpen ona, eta bitartean, erdian berriro HABEren plan estrategikoaren aipamen bat, han eta hemen agertzen dira haren zantzuak eta lorratzak, agian egun batean manifestatuko zaigu osorik nonbait.

Ai ama! Albiste hau irakurri eta pena sentitu dut. Hitz batzuen aukeraketak eragin dit sentimendu hori. Bi hauek bereziki:

Antza azterketetan ikasleei eskatu izan zaie: "interesekoak ez diren hainbat proba gainditzeko" . Eta zergatik ez diren interesekoak? galdetzen diot nik neure buruari. Ikasleek proba horiek ondo egiten dituztelako? Ondo egiteak interesa kentzen dio ebaluazio-prozesuari? Agian saritu beharko genituzke irakurtzen eta entzuten trebeak direlako, ezta?

Hitz hauek ere huts egin didate: "protagonismo handia"
"Ikasleei mesede egiteagatik ez ezik, euskaltegiei protagonismo handiagoa emateko ere hartu da erabaki hau"
Euskaltegiek, ez dakit, baina euskaltegiko irakasle honek ez du protagonismorik nahi, ez handiagoa ez txikiagoa; irakasleak gara eta gure lana baliotsua da, ez dut azaldu behar zergatik, ezta? Gure lana balioestea nahiko nuke, protagonismo guztiak bazter utzita.