Zu, gu eta hirurok
2010, Urtarrila 21 - 13:01 — benitoProposamen berria Interneten euskaldunontzat. Ezagutza partekatzeko sare sozial irekia. Irekia aukera askotara, atarramendua aterako diogu, seguru.
Profila osatzen joan beharko dut (Buaaaaa! Ez daukat lagunik)
50 mezu talde euskaldun baten alde
2009, Azaroa 25 - 10:54 — benitoSingle ingelesezko terminoarekin ezkongabeak edo bikoterik ez duten pertsonak izendatzen dira. Azkenotan hauentzako eskaintza zabalduz joan da sarean: foroak, guneak, eskaintzak, zerbitzuak, sare sozialak, merkatu-talde erakargarria nonbait.
Single-entzako sare sozial lokalak ere eratzen izan dira, Bilbon adibidez Club Clan 2000 dugu, Ning-en egitura erabilita antolatu den sarea. Eta han, erabiltzaile baten eskaera hau aurkitu dugu: 50 mezu talde euskaldun baten alde, alegia, sare sozial horien bidez "single" euskaldunen artean harreman sarea osatzeko deialdia.
Bistan dago, harreman sareak berez ehuntzen dira askotan.
El Euskaltegi Facebook-en
2009, Urria 25 - 22:38 — benitoEl euskaltegi blogeko Elenak izen bereko orria sortu du Facebook-en. Arrazoia:
Horrela, nire asmoa da leku bat edukitzea komunikatzeko, ideiak trukatzeko, kritikatzeko, eta beharrezkoa bada, askok edukiko duzuen kokoteraino nago euskararekiko pentsamendua barrutik kanporatzeko.
Irakurle Kluba
2009, Urria 23 - 16:40 — benitoGorka Azkaratek eman digu sare honen berri. Leioako irakurle-klubaren inguruan sortu da (ez nahastu Leioako Unibertsitateko irakurle klubarekin) eta, jakina, literatura du ardatz.
Elkarrizketa
2009, Urria 16 - 09:34 — plisti-plastaA: - Aspaldian ez duzu eguneratu bloga. Uztekotan al zara?
B: -Ez, emakumea, bloga interneteko nire etxea da. Baina sare sozialak ziberespazioko tabernak dira.
A:- Hau da hau! Gu kezkatuta etxean agertzen ez zarelako eta zu , berriz, parrandan lasai asko.
Sare sozialak berrikuntza
2009, Iraila 16 - 16:44 — benitoGipuzkoako Udal Euskaltegiek bi berrikuntza aurkeztu dituzte: 4. maila eta sare sozialak. Ez dakit zehazki azken honetan zer asmo duten. Twitter eta Facebook aipatu baino ez baita egin artikuluan.
Facebook aurrez aurreko irakaskuntzaren osagarri gisa
2009, Iraila 16 - 01:01 — benitoAinhoa Ezeizak Facebook erabili du lehengo ikasturtean gaztelania irakasle lanetan, eta orain esperientziaren gaineko gogoeta eta ondorioak ekarri dizkigu, sare sozialak hedatzen ari diren honetan, hizkuntzen irakaskuntzarako aplikazioa nondik nora garatu daitekeen argi azalduta eta arrazoituta.
Sare sozialak eta ikasleak
2009, Maiatza 26 - 18:30 — benitoMesfidantza ugari sumatzen da giza sare, ikasle eta hezkuntzaz hitz egiten denean; nik, behintzat, hala bizi izan dut galdetu didatenean. Nire ustez, sare hauen filosofia eta funtzionatzeko era guztiz bat datoz hezkuntzaren hainbat helbururekin: irakasleok eta ikasleok gune partekatu bat izan dezakegu elkarrekin lan egiteko, mota guztietako edukiak trukatzeko, partaidetza sustatzeko… Ikasleek eskolako sarea, lanerako tresnaz gain, euren adierazpen gunetzat hartzean egon al daiteke arrakastaren giltza?
IKTeroak-era (Ikasleak eta giza sareak) ekarri digu Maitek Hik Hasi aldizkariaren 138. zenbakian publikatu duen artikulua: "Sare sozialak hezkuntzan, alde batera utzi edo aukera baliatu".
LangoLab: hizkuntzak ikasteko bideoak eta testuak
2009, Martxoa 18 - 11:47 — benitoInterneten beste zerbitzu bat hizkuntzak ikasteko. LangoLab honek Youtube-tik hartutako bideoklip batzuei transkripzioa gehitu eta azpititulu modura jartzen du. Horrekin batera aukera ematen digu transkripzioko hitz batean klikatuta leihotxo batean haren esanahia kontsultatzeko, edo oharrrak eta galderak egiteko hitz horren inguruan.
Bideoez gain testu idatziak ere eskaintzen ditu irakurgai modura, eta blog batzuk ere badaude. Guztietan ematen du aukera hitzen esanahia kontsultatu eta oharrak eta galderak egiteko. Azken batean Aizu! eta HABE aldizkarietan adibidez ikasleari irakurtzen laguntzeko erabiltzen denaren antzeko sistema (alboko hiztegitxoa) ekarri du internetera LangoLab honek, garatuago eta osoagoa.
Hitz gehienetan oraindik ez dugu definiziorik aurkituko hala ere, hiztegiekin arazoak dituztela ematen du. Dena dela, hitzen adierak aurkitu eta iruzkinak egiteko leihotxo hori oso interesgarria iruditu zait, horretarako eta beste gauza batzuetarako, ikaslearen idazkietan iruzkinak egiteko adibidez.
Sanbit: hizkuntzak ikasteko beste leku bat
2009, Martxoa 9 - 18:50 — benitoInterneten ugaltzen ari diren hizkuntzak ikasi eta praktikatzeko zerbitzuetan bat gehiago. Sanbit hau, sarrera ikusita, lau trebetasunen lanketatik praktikara eta hizkuntz-trukera doala ematen du. Sakonago aztertu beharko da.
Post-TICen bidez.